قصيدة عن الام

قصيدة عن الام
قصيدة عن الام
قصيدة عن الام
يواسيني وانا الميت وحالي يجبر الدمعات

تسيل من الذي فيني ويبكي وهو يواسيني

وانا ابكي واتنهد وارسم بالحزن لوحات

يجبروني عشان امشي ورجلي ما تمشيني

قتلت رعايتي بيدي قتلت الحب والرحمات

حرمت النفس من حقها وانا ابكيها وتبكيني

وكنه حلم قدامي يقيدني من الصرخات

ابي اصحى ولكني عجزت القى ال يصحيني

فداك القلب يايمه ومهما قلت من كلمات

صغيره في كبر حقك بس اتمنى تعذريني

نهبت الفرح من بيتي صحيح اني خسيس الذات

صحيح اني ولد طايش وكل ما أسمعه فيني

تجول عيونهم فيني تفصل مني قياسات

وتشيح وجوههم عني وكني غيرت ديني

يظنوا حزنهم اكبر وهم اصحاب هالمأساة

وانا اتحدى اذا فيهم ربع ما يحترق فيني

نقص قدري بعد موتك وغابت نشوة اللذات

وصار الهم عكازي اباكيه ويباكيني

عطيتيني بدون حساب ولا سمعتك تقولي هات

وانا اشرب حيل من دمك ودمك ما يكفيني

يايمه ارجعي كافي ابجلس معك لو لحظات

واقبل ايدك ورجلك وافرش لك رمش عيني

يايمه ما تحملهم يقولوا فات ما قد مات

تعالي غيري هالقول واطيعك باقي سنيني

واترك عادة التدخين وانفذ ما تبي بسكات

واصلي الفجر في المسجد قبل منتي تصحيني

يايمه ارجعي تكفين وطفي شمعة الآهات

ابيك انتي ولا غيرك على موتك تعزيني

وضميني وداويني مثل ما كانت الهقوات

ما ابي احدن يواسيني ابيك انتي تواسيني

دخيلك بس لا تبكي اذا شفتي بي الدمعات

انا مقوى ابكيك اذا انتي تبكيني .

حبيت ابديها بقصيده للام للشاعر عايد المسيلم

صورة الشاعر عايد المسيلم
أمــــــــــي

امي يارمز التفاني والصبر

ملحمه عشتي لنا كلك عبر

تسعة شهور حملتيني بوهن

شفتي ألوان العذاب بكل شهر

وبليلة الميلاد كانت فرحتك

في مهادي كنت انا لك يانهر

انتي ضميتيني في حضنك دفا

عن لهيب الصيف أو برد الدهر

تكبرين ونكبر احنا بدنيتك

كل شيبه في شعر راسك فخر

ان بكت عيني بكت عينك اسى

وان ضحك سني ضحكتيلي عمر

وان طلبتك حاجتن كلك عطا

انتي اكرم من على الدنيا ظهر

امي يانبع الوفا الله يديم

طلتك في ليلنا وانتي القمر

في صلاتك ياكثر ماتطلبين

ربي يحفظنا من عيون البشر

صرتي شمعه تحترق لجلي انا

اهتدي فيها اذا طال السفر

وعند باب البيت ياما تحترين

ان تأخرت بظروفي واعتذر

ياحبيبة قلبي يايمه انا

ايه ابوس تراب رجلك وافتخر

ارفعي راسك مدام اني قدرت

لك احقق امنياتك واختصر

فاخري فيني يايمه بينهم

جعل يفدونك قليلين القدر

ياحكاية عز سطرها الزمان

كل حرف فيها من دمعك سطر

رفرفي يابيرق الحب التليد

واقطفي من كل بستاني زهر

جعلي لاحجيت للبيت العتيق

يقبل الله دعوتي لج معتمر

ياسنا الفضه ولمعات الذهب

يارحيق المسك ياغيث المطر

يا أمان الروح يارجوى النفوس

ياشراعي لاانتشى موج الخطر



صعب يوصف لك شعوري كم بيت

قالهن قلبي بحبك بالشعر

بس شوفي يمه لامني طريت

اسمك دموعي بخدي تنتثر


الشاعر عايد المسيلم
الرد مع إقتباس