محمد الحسن سالم حميد ست الدار

محمد الحسن سالم حميد ست الدار
محمد الحسن سالم حميد ست الدار
محمد الحسن سالم حميد ست الدار
ست الدار فى زمن اخر ( عذراً هرمنا الابداعى محمد الحسن سالم حميد )

بسم الله الرحمن الرحيم
ست الدار فى زمن اخر

ست الدار بت احمد جابر
كيف احوالك مشتاق ليك
كيف الصحة والاولاد...
راشد بقرا ...............
ولا بزوغ من مدرستو
وكيف احوالن التومات
ربى يكونن لى طيبات
اما احوالى
فربك يستر
يظهر انو بدأ المشوار
فى يوم الخدمة
جانا مديرنا
وديه حصل فى خميساً فات
قبال شهرين
سلم ورحب ..
هلل وكبر ..
وقرأ ايتين
قال المصنع ماشى تمام
وزاد انتاجنا
الطاق طاقين
وجابلو كلاماً ما مهضوم
جهاداً ضارى
وبعث حضارى
وبلا متضارى
وخرم سب الامريكان
وفى اخر الجلسة
اريتو ما قال
قال المصنع راح يتخصخص
بره جلسنا فى ايدنا الشاى
كنا حداشر
لسه حداشر
زايد واحد
اريت لو كان النوباوية
كنا نناقش فى الاحوال
مصنع بنتج
كيف يتخصخص
مصنع بربح
كيف يتخصخص
والله عجاب
والله عجاب
وخضنا كمان فى الامريكان
اقيف أأأأ زول
مالك ومال الامريكان
تخطب ود البنك الدولى
وتمشى تسب الامريكان
مالك ومال الامريكان
بلدك كل شبرين
فى ايد
وماشى تسب الامريكان
مالك ومال الامريكان
سلاحك دوشكا
وجوز هليكوبتر
وماشى تناطح الامريكان
مالك ومال الامريكان
وقلنا كلام عن بره المصنع
عن ... وعن .... وعن ....
وصلو قولنا مدير المصنع
وزولك ابداً تب ما قصر
وصل قولنا كلاب .........
وتانى المشهد زاتو اتكرر
تتذكرى جعفر ؟
تارى الراجل
رغم قساوتو
كان وحياتك الطف وارحم
بدل النقطة وكف العسكر
شفنا عمايل
ضقنا هوايل
وربك اكبر
وبعد الشهر اتطاول وعدى
وشفنا خلالو الذل والويل
كنا حداشر زول مرفود
والواحد اترقى
ما تشيلى هموم
ربك قادر وما بنسانا
والارزاق ما هية المصنع
الا وحاتك وبترجاك
راشد .. راشد .. والتومات
لازم ينجحو ... لازم ينجحو
وبختم ليك بى شوقى وودى
ودعوة ربى
يغطى سماك

الزين ود حامد

ملحوظة:
مرسل ليك
مع صالح مية
يمكن اطول لى شهرين
مدى رجولك قدر لحافك
واوعك تطرى
دروب الدين

الرسالة الثانية
سيد الناس
الزين ود حامد
جانى جوابك من يومين
شالنى الخاطر ساقنى بعيد
لى زمناً اغبر
ما تتكدر ..
وزى ما قلتا الخالق رازق
وبكرة الحال لازم يتغير
ما زعلانة على الرفدية
ولا زعلانة على الماهية
الا عليهو البلد الصامد
متين يرتاح ترحل احزانو
متين ينجم يتلما كيانو
اول البارح
جبتا الراديو
يمكن فيهو تجينا بشارة
من اخبارو فى ديك الجمعة
ابداً تب ما جابلو عديل
نحنح فيهو مذيعو وبرطم
جانا بلاغ من قايد الجيش
جيشنا الباسل وديمة جسور
حرر فشلا والبيبور
وسابو الخونة سلاح وعتاد
ومية خارج وخمسة شهيد
الحلال طلعوبا مسيرة
ساحة المولد فى حلتنا
دفسوها خلق
حررووم وصبين
عمالنا وطلبة
ميرى وملكى
دفاع وعساكر
وشيخ الحلة اب كرشاً زير
جانا معاهو افندى وزير
سلم ورحب
هلل وكبر
وقرأ ايتين
تارى مديركم
ما هو وحيد
والبلد الصامد بين نارين
نار من مدفع شايلو مجاهد
ونار من مدفع شايلو معارض
والله وكيل
والله وكيل
حكم الجور ما بروح بى طلقة
الاستبداد ما تغيرو دوشكا
صوت الشارع اقوى وابلغ
من مية مدفع ومن ترسانة
من العسكر ودباباتو
وصوت جبخانة .. ومن زنزانة
ارمو سلاحكم يلا تعالو
نملآ الشارع
نملآ سجونم
فى الخرطوم والبقعة وبحرى
ارض نضالنا وديه مكانا
ايد على ليد
الخوف يتبدد
ليد على ايد
الامل يتجدد
ايد على ايد
الغضب يتمدد
وصوت الواحد يبقى الف
الله معاك يالصادق ودغرى
واصل دربك وما تتردد
مهما سواد الليل غطانا
بكرة خيوط النور راح تطلع
والحرية تعود من تانى
بعد كفاح الشاب والشفع
عقابك زين ما تشيلو هموم
فيهو ام راشد والتومات
امانة على
ارعاهم واسهر
وما يحتاجو قريب لا غريب
حتى الغمة تفوتنا وترحل
وتعود تملآلنا البيت ضحكات

ست الدار

الرسالة الاخيرة :
ست الدار بت احمد جابر
شوق وسلام
زى ما عرفتك ديمة اصيلة
وبلد اجدادك فى عينيك
همك خيرو
وعزة ناسو
وديمة همومو بتسهر بيك
قولك غسل الحزن الكامن
وزاد القلب ثبات وسكينة
وبكرة حا يملا الشارع صوتنا
نفجراً غضباً كامن فينا
الطغيان بت احمد جابر
مهما اتطاول ليهو نهاية
وزى ما ضاق النصر فى يوم
بكرة بلوك المر وهزيمة
وزى ما سقانا الذل والويل
بكرة شرابو من البسقينا
وزى ما ملابنا بيوت اشباح
بكرة يكون الحسرة سجينا
ده التاريخ ما بتنسى دفاترو
ارجعى فتشى فى ماضينا
نحنا كفاحنا بأيداً فاضية
وقلب ملان ايمان وعزيمة
وصدرنا فاتح
بسترو الله
هو معانا وهو البحمينا
نحنا سلاحنا الصوت الهادر
صوت الحق النصرو بجينا
وفجر الثورة الغابت شمسو
بكرة يشابى ويطلع لينا
نورو يضوى
طريقنا القاتم
يهزم فينا سواد الليل
يرقص رمل الشارع فرحة
يشيل شبال
من شجرو النيل
وتمسح مدناً باكية عيونا
تجر النم
نغنى نشيدا
تقلع توب حدادا الطال
تفش العتمة بى ايدا
وتمرق لى صباح اجمل
تضم احضانو
يوم عيدا